බිනර පුර පසළොස්වක පොහෝ දිනය අදට (20) යෙදී ඇති අතර කොවිඩ් වසංගත තත්වය හේතුවෙන් පනවා ඇති සංචරණ සීමා හමුවේත් බෞද්ධ ජනතාව වෙහෙර විහාරස්ථාන වෙත ගොස් සෞඛ්‍යාරක්ෂිතව ආගමික වතාවත්වල නිරත වනු දක්නට ලැබිණි.
වෙනදා මෙන් පොහෝ දින ශීල සමාදාන වැඩසටහන් ක්‍රියාත්මක නොවූව ද බොහොමයක් විහාරස්ථාන ජනතාවට ආගමික වතාවත් වෙනුවෙන් විවෘත කර තිබිණි.
පැමිණි ජනතාව බොහෝ දෙනෙක් නිසි ලෙස මුහුණු ආවරණ පැළඳ දුරස්ථභාවය රැක ගනිමින් ආගමික වතාවත්වල නිරත වුවත් ඇතැමුන් සෞඛ්‍ය ආරක්ෂිත පියවර නිසි ලෙස අනුගමනය නොකරන ආකාරයක්ද දක්නට ලැබිණි.
බිනර පුර පසළොස්වක පොහෝ දිනය භික්ෂූණි ශාසනය ආරම්භවීම ඇතුළු ශාසනික ඉතිහාසයේ වැදගත් සිදුවීම් රැසක් සිදුවූ දිනයක් වන අතර වස් සමයේ අතරමැදි පොහොය ද වේ.
එමෙන්ම භික්ෂුනී ශාසනය ආරම්භ කරමින් මහා ප්‍රජාපතී ගෝතමිය ඇතුළු කාන්තාවන් 500ක් සසුනට එක්වූයේද බිනර පෝය දිනකදීය.