කොළඹ දේවි බාලිකා විද්‍යාලයේ කොටසක් වෙනත් ස්ථානයකට ගෙනයාමේ උත්සාහයක් ඇතැයි දේවි බාලිකාව සුරැකීමේ සංවිධානය පවසයි.
ශ්‍රී ජයවර්ධනපුර විජයාරාම විද්‍යාලය දේවි බාලිකා විද්‍යාලයට පවරාගෙන එහි උසස් පෙළ විද්‍යා හා ගණිත අංශයක් එම විද්‍යාලයට ගෙනයාමට තීරණයක් ගෙන ඇති බවත්, එම තීරණ විදුහලේ විදුහල්පතිනිය, ගුරු මණ්ඩලය හෝ ආදි ශිෂ්‍යාවන් දැනුවත් නොකර ගෙන තිබීම ගැටළුවක් බවත් එම සංවිධානයේ සභාපති, නීතීඥ, ආචාර්ය දයානි පනාගොඩ මහත්මිය පැවසුවාය.
මෙම කාර්යය සඳහා කැබිනට් පත්‍රිකාවක් ඉදිරිපත් කර එය ක්‍රියාවට නැංවීම පිළිබඳ සොයාබැලීමට මේ වන විට අනුකමිටුවක් පවා පත්කර ඇති බව දැනගන්නට ඇතැයි ද ඇය සඳහන් කළාය.
දේවි බාලිකා විදුහලේ අතිරේක ගණිත හා විද්‍යා අංශය විජයාරාම විද්‍යාලය තුළ පිහිටුවීමට මෙරට කෝටිපති ව්‍යාපාරිකයකු රුපියල් කෝටි 10ක ප්‍රදානයක් ලබාදෙන බව ද දැනගන්නට ඇතැයි කී සභාපතිනිය එම මුදලින් දැනට ඇති විදුහල්භූමියේම ගොඩනැගිල්ලක් ඉදිකර ගණිත හා විද්‍යා අංශය දියුණු කළ හැකි බව ද කීවාය.
මෙම භූමිය ව්‍යාපාරිකයකුට එක් බිම් කඩක් පමණක් වුවත් එය ආදි ශිෂ්‍යාවන් වන තමන් ජීවිතය ජයගන්නට ගුරුහරුකම් ලද පින්බිම බව ද පනාගොඩ මහත්මිය සඳහන් කළාය.
