ආණ්ඩුව ඇතුළේ බිහිවීමට නියමිත ස්වාධීන කණ්ඩායමේ නව නායකත්වය සඳහා ජ්‍යෙෂ්ඨතම නීතිවේදීන් ලෙස සැලකෙන සුසිල් ප්‍රේමජයන්ත, අනුර ප්‍රියදර්ශන යාපා සහ විජයදාස රාජපක්ෂ යන මහත්වරුන්ගේ නම් යෝජනා වී ඇති බව දැනගන්නට තිබේ.
මොවුන් තිදෙනාම උගත්, බුද්ධිමත්, දේශපාලන පළපුරුද්ද සහිත නීතිඥවරුන් වීමත්, ස්වාධීනව තීන්දු තීරණ ගැනීමේ හැකියාවෙන් සමන්විත වීමත් ඒ සඳහා හේතු වී ඇති බව වාර්තා වේ.
මින් සුසිල් ප්‍රේමජයන්ත සහ අනුර ප්‍රියදර්ශන යාපා යන මහත්වරු ආණ්ඩු බලය හෙබවූ එක්සත් ජනතා නිදහස් සන්ධානයේ මහලේකම්වරුන් ලෙස කටයුතු කොට, දේශපාලන පළපුරුද්ද සහිත අය ලෙස සැලකේ.
එමෙන්ම විජයදාස රාජපක්ෂ මහතා වරෙක අධිකරණ අමාත්‍යවරයකු ලෙස කටයුතු කළ අයකු මෙන්ම තීරණාත්මක නඩු විභාගයන් කිහිපයක්ම සාර්ථක ලෙස මෙහෙයවා ජයග්‍රහණය කළ අයෙකි.
ඒ අනුව ඔවුන් තිදෙනාගෙන් එක් අයකු ආණ්ඩුවේ ස්වාධීන කණ්ඩායමේ නායකත්වය සඳහා යෝජනා කිරීමට සැලසුම් කර ඇති බවත් දැනගන්නට ඇත.
